HARLEY-DAVIDSON GOLDEN MASTER 哈利黃金大師電單車

HARLEY-DAVIDSON GOLDEN MASTER 哈利黃金大師電單車

今次拿出來記錄一下既就係呢架1/12 IMAI(今井)既古典哈利，
電單車模型我只得幾盒，買到佢真係一個字---緣^^
話說十多年前路過牛頭角某屋村XX玩具店(大家應該知邊間XDD)
呢間本來賣玩具多既，但佢又成日一盒二盒咁吊起D高達模型賣，
好似中秋賣花燈咁好Q過癮，仲時常都有驚喜價，
所以當年都有不少模友去尋幽探秘XDD我就係其一啦~~
咁有次就係罕有地見到有幾盒IMAI電單車吊響度，
冇記錯應該全部都係哈利，尤其係呢架金光閃閃，
馬上就比佢吸引住，望下個價好似$80(太耐唔記得)
總知就係速速磅沒有兩頭望帶佢回家^^
E加念番可能係今井當年執粒既清倉貨，
講番呢套模型，今次真係非常出色，
模子估算八十年代產品，上網找了找資料不多，
但同其它廠一樣，一個模九萬幾種花式，
去1999.co見到青島收左今井個模仲有得賣既，
就咁睇青島都有不少款式，可想當年今井仲多，
呢隻黃金大師搵勻都冇真車相，可能係模廠獨家出品XDD！！！
如果你整架咁既真車行出街都真係幾招積^^
大家都知模友對電鍍啪屎既愛且恨...........
所以當年整佢既時候，都係儘量做好一點沒有電鍍既地方，
個油箱呀上左水貼磨到好令架.......不過唔知點解，
上左好多光油包住架啦，但係都甩左色.......
展轉咁多年我都成日拿出來觀賞，
但係每次都整甩整斷零件，搞到五勞七傷，
左邊有件大金蓋甩左金變左銀真係傷心，
補噴番星光金都仲係爭好遠..........U_U
所以快快影相記錄好好收藏，過多十年八載可能變成 silver master XDD
當年買左隻1/12 LEON公仔，雖然冇阿樂舒華生力啤咁型，
但放埋一齊都好夾丫XDD
所以搵捚佢做埋模特兒拍番套寫真XDD
講開又講哈利電單車真係好有魅力，
如果想收一架，星星1/6最近會復刻，內容相當精彩！！！